పన్ను చెల్లింపుదారులకు అలర్ట్.. ఐటీఆర్ ఫైలింగ్ షురూ

పన్ను చెల్లింపుదారులకు ఆదాయపు పన్ను శాఖ ముఖ్యమైన అప్‌డేట్ ఇచ్చింది. 2026-27 అసెస్‌మెంట్ సంవత్సరానికి (2025-26 ఆర్థిక సంవత్సరం) సంబంధించిన ఇన్‌కమ్ ట్యాక్స్ రిటర్న్స్ (ఐటీఆర్) దాఖలు ప్రక్రియను అధికారికంగా ప్రారంభించింది. ఈ మేరకు ఐటీఆర్-1 (సహజ్), ఐటీఆర్-4 (సుగం) ఫారాలకు సంబంధించిన ఎక్సెల్ యుటిలిటీలను ఈ-ఫైలింగ్ పోర్టల్‌లో అందుబాటులోకి తెచ్చినట్లు ప్రకటించింది. 

ఈ విషయాన్ని ఆదాయపు పన్ను శాఖ సోషల్ మీడియా ప్లాట్‌ఫామ్ 'ఎక్స్‌' ద్వారా తెలియజేసింది. పన్ను చెల్లింపుదారులు ఇప్పుడు ఈ రెండు ఫారాలను ఆన్‌లైన్‌లో నేరుగా ఫైల్ చేయవచ్చని లేదా ఎక్సెల్ యుటిలిటీని డౌన్‌లోడ్ చేసుకుని ఆఫ్‌లైన్‌లో కూడా నింపవచ్చని స్పష్టం చేసింది. ఆఫ్‌లైన్‌లో ఫారమ్ నింపిన వారు, ఆ తర్వాత JSON ఫైల్‌ను జనరేట్ చేసి, ఈ-ఫైలింగ్ వెబ్‌సైట్‌లో అప్‌లోడ్ చేయాల్సి ఉంటుంది. ఆడిట్ పరిధిలోకి రాని పన్ను చెల్లింపుదారులు తమ రిటర్నులను దాఖలు చేయడానికి సాధారణంగా జులై 31 చివరి తేదీగా ఉంటుంది.

ఐటీఆర్-1 (సహజ్) ఫారాన్ని రూ.50 లక్షల వరకు వార్షిక ఆదాయం ఉన్న నివాస భారతీయులు ఉపయోగించవచ్చు. ఇక, ఐటీఆర్-4 (సుగం) ఫారాన్ని రూ.50 లక్షల వరకు ఆదాయం ఉన్న వ్యక్తులు, హిందూ అవిభాజ్య కుటుంబాలు (హెచ్‌యూఎఫ్‌), ఎల్‌ఎల్‌పీలు మినహా ఇతర సంస్థలు దాఖలు చేయవచ్చు.

ఈ అసెస్‌మెంట్ సంవత్సరానికిగాను సెంట్రల్ బోర్డ్ ఆఫ్ డైరెక్ట్ ట్యాక్సెస్ (సీబీడీటీ) ఇప్పటికే కొత్త నిబంధనలతో కూడిన ఐటీఆర్ ఫారాలను నోటిఫై చేసింది. దీని ప్రకారం లాంగ్-టర్మ్ క్యాపిటల్ గెయిన్స్, షేర్ల బైబ్యాక్ లావాదేవీల వల్ల కలిగిన నష్టాలు వంటి అదనపు వివరాలను వెల్లడించాల్సి ఉంటుంది. కాగా, 2025-26 ఆర్థిక సంవత్సరంలో దేశ నికర ప్రత్యక్ష పన్ను వసూళ్లు 5.12% వృద్ధితో రూ.23,40,406 కోట్లకు చేరినట్లు సీబీడీటీ గణాంకాలు వెల్లడించాయి.